Cjantâ. Cors di didatiche musicâl par furlan

Il cors di didatiche musicâl in lenghe furlane pai insegnants de scuele de infanzie e de scuele primarie al vûl dâ ai docents sugjeriments e struments par doprâ i cjants pe infanzie, de tradizion e di autôr, par ativitâts di didatiche musicâl che a puartin i arlêfs a sperimentâ lis basis de scriture musicâl, di là di meti in vore lis lôr capacitâts di scolte, di intonazion, di memorie e di coordenazion ritmiche motorie. Par ogni cjant e ven fate une unitât didatiche complete, sedi pe infanzie che pe primarie. Cun di plui par mieç di laboratoris pratics, i insegnants a vegnin compagnâts tal produsi ativitâts de stesse fate cun cjants sielzûts di ognidun. I iscrits a àn di vê un strument melodic (xilofon, flaut, sunete, melodiche…) par rivâ a la note cuant che si à di cjantâ. Il cors al è di 21 oris. Il cors al è a gratis e viert a no plui di 25 iscrits par permeti a la insegnante Arianna Plazzotta di stâ daûr a ducj i corsiscj e puartâur a une cressite professionâl spindibile subit te lôr classis. La formazion e je ricognossude daûr des liniis vuide MIUR par 21 oris complessivis e cui che al rivarà fin insom dal percors al podarà discjamâ l’atestât te plateforme Moodle, dulà che si ten il cors.