1. Lenghe e culture
Sussidiari di furlan, strument fondamentâl par aprofondî la cognossince de lenghe furlane ma ancje dai fats storics plui impuartants che a àn tocjât tal timp il Friûl.
Lis dodis unitâts didatichis a son stadis organizadis intune part discorsive di caratar storic che e da po dopo il spont par tratâ singui aspiets gramaticâi, di sintassi e di grafie de lenghe furlane, cun focus specifics su chescj temis e esercizis sedi di comprension tal test che par fissâ lis regulis de lenghe.
2. Scrivi par furlan
Gramatiche de lenghe furlane che e presente une descrizion atente de lenghe, des sôs particolaritâts, des regulis e des ecezions. Il furlan che al ven presentât al e chel comun, centrâl, il furlan de miôr tradizion leterarie dal Votcent e dal Nûfcent, ma ancje une lenghe atente a ricevi i contribûts des varietâts locâls.
3. La grafie uficiâl de lenghe furlane
La grafie uficiâl de lenghe furlane e je stade fate buine cul Decret dal President de Zonte regjonâl n. 392 dai 25 di Otubar dal 1996, su la fonde de propueste di grafie adotade ai 15 di Lui dal 1986 dal Consei de Provincie di Udine, adun cu lis Provinciis di Gurize e Pordenon. Plui tart la grafie uficiâl e je stade cjapade dentri tal art. 13 de Leç regjonâl 15/96.
4. Norme per la grafia delle varietà della lingua friulana
Cun Decret dal President de Zonte Regjonâl n.41 dai 07 di Març dal 2013 al è stât adotât il Regolament pe grafie des variantis de lenghe furlane, viodude la Gjeneralitât de Zonte regjonâl n. 2377 dai 28 di Dicembar dal 2012, stes argoment.
5. Nons furlans di lûc
Repertori complet dai nons di lûc de regjon furlane e des regjons dulintor. Lis formis dai nons a vegnin presentadis te forme uficiâl taliane e ta chê furlane e, se al à il câs, ancje par todesc, sloven e venit. La grafie che si dopre e je naturalmentri chê uficiâl, che e trasmet la sensibilitât e lis sonoritâts dal furlan comun (koinè), ma a son une vore preseadis ancje lis segnalazions des formis furlanis locâls, cetant impuartantis pal studi de storie e de fisionomie lenghistiche de nestre Regjon.
6. Ortografie furlane
Guide che e presente lis regulis ortografichis dal furlan e che e jude a scrivi la marilenghe cuntun cjapitul che al spieghe cemût che si scrivin ancje lis varietâts locâls.
7. Rispietìn la marilenghe
Il volum al propon cualchi rasonament sul ûs dal furlan te nestre comunitât, par capî miôr la fuarce espressive de nestre lenghe e il sens de sô trasformazion.