Tal 2020 a son colâts i 150 agns de muart di Jacopo Pirona (1789 † 1870), om di letaris, bibliotecari, docent, cultôr di furlan e protagonist de vite culturâl dal so timp, un om che al à dedicât dute la vite ai studis su la storie, la culture, la lenghe e lis istituzions dal nestri Friûl. Il Comun di Dignan, so lûc di nassite, la Agjenzie Regjonâl pe Lenghe Furlane (ARLeF) e la Societât Filologjiche Furlane a àn inmaneât plui di une iniziative par memoreâlu come che si conven e no podeve mancjâ, propit a segnâ la impuartance dal lavôr di chest studiôs ancje pe educazion dai zovins e pe trasmission dai valôrs de nestre tradizion, la atenzion al mont de scuele, il lûc là che si formin lis cussiencis e lis sensibilitâts dai fruts.
Partint de vite e de opare di Jacopo Pirona, al nas chest percors didatic fondât su la metodologjie CLIL. La opare si compon di trê sezions, ognidune des sezions e presente diviersis unitâts didatichis par ogni classe, struturadis in plui lezions:
- Infanzie:
Su lis olmis di Jacopo Pirona, dividude in cuatri lezions (Cui isal Jacopo Pirona?, Jentrìn te cjase dal Pirona, Il for dal Pirona, Ce isal un vocabolari?);
- Primarie:
- classis prime e seconde: Cui isal Jacopo Pirona?, dividude in trê lezions (Cui isal Jacopo Pirona?, A cjase di Jacopo Pirona, Il vocabolari);
- classe tierce: L’arbul de famee Pirona, dividude in dôs lezions (La famee dal Pirona e Paîs);
- classe cuarte: Pirona, Dignan e il Tiliment, dividude in dôs lezions (Dignan e Il Tiliment);
- classe cuinte: L’erbari dal Pirona, cuntune lezion (L’erbari dal Pirona);
- Secondarie di I grât:
- classe prime: Jacopo Pirona. Inteletuâl e om dal so timp, cuntune lezion (Pirona, om dal so timp e dal so lûc);
- classe seconde: Il bibliotecari e l’epigrafist. Mistîrs curiôs e delicâts, cuntune lezion (Mistîrs curiôs e delicâts);
- classe tierce: Il lessicograf (l’om des peraulis), cun cuatri lezions (Il vocabolari, Dizionaris e vocabolaris inte cuistion de lenghe, Il Vocabolari Pirona, Lis schedis di catalic).