Ti conti il Vaiont: il curt di animazion cui dissens di Paolo Cossi
Puedial un dissen animât contâ une tragjedie? Isal pussibil pandi midiant di un fumet la storie di un disastri causât dal om?
La rispueste si clame "Ti conti il Vaiont", la video-animazion de graphic novel realizade de Filologjiche tal 2022 par contâ, in mût delicât, sclet e sempliç, ce che al è sucedût ai 9 di Otubar dal 1963, cuant che la mont Toc e je vignude jù provocant une ondade di passe 250 metris che e à sghindât par miracul i paîs di Nert e Cas, ma e à sdrumât Longaron e no dome cun cuasi 2000 muarts in dute la valade.
Cuntun lengaç adat par fruts, zovins e grancj, i dissens dal fumetist Paolo Cossi nus menin ae scuvierte des causis e des conseguencis di chê che e je stade une des plui grandis disgraciis de seconde metât dal Nûfcent.
In ocasion dal sessantesim inovâl de tragjedie, la Societât Filologjiche Furlane e il Docuscuele a metin a disposizion dai insegnants e dai students dal Friûl ducj i materiâi realizâts cul progjet "Ti conti il Vajont".
In cheste pagjine al è pussibil
- viodi "Ti conti il Vajont": fumet animât firmât di Paolo Cossi cun animazions e montaç di Nicola Marchesin, vôs di Caterina Di Fant e Paolo Nicli, musichis di Jan Caberlotto
- scjamâ la graphic novel di Paolo Cossi
- scjamâ il cuader didatic che al met adun lis unitâts didatichis pes primariis e pes secondariis di prin grât, realizadis di Donatella Bello, Linda Facini, Tamara Pozzebon e Anna Zossi sot la supervision sientifiche pe metodologjie C.L.I.L. di Ada Bier.
No son plui scusis! Cheste e je une pagjine de nestre storie di fâ cognossi a lis gjenerazions gnovis par difondi la memorie e nudrî une cussience civîl coletive.
Ai 3 e ai 6 di Otubar aes 9:30 sore sere il curt animât al va in onde sul canâl RAI 3 bis (810). Tai prossims mês al sarà metût in onde ancje "Ti racconto il Vajont", il dissen animât par talian, simpri di bande de sede regjonâl de RAI pal Friûl Vignesie Julie.
Version par talian: