Il diari bilengâl Ólmis al compagne i nestris fruts a scuele di passe trente agns, puntuâl a presentâur gnovis esperiencis par capî miôr l’ambient, la storie, lis tradizions e l’identitât dal Friûl. Ólmis al reste un pont di riferiment ancje pai mestris e pai gjenitôrs, un aiût impuartant par rifleti su la nestre realtât e sui cambiaments che il mont ogni dì nus propon, une ocasion par resonâ su la dimension di un teritori, il nestri, che i zovins simpri di mancul a vivin e a cognossin.
Cheste volte l’Ólmis al è dedicât ae
Protezion Civîl de nestre Regjon e nus ufrìs un percors su la storie e la funzion di cheste rêt di solidarietât, cu la gjestion des emergjencis e il valôr dal volontariât, l’ativitât di chei che si metin a disposizion di dute la comunitât e soredut dai plui debui. Cussì al è stât ancje in ocasion dal “Orcolat”, il
taramot dal 1976, che tal 2026 o ricuardìn pal
inovâl dai cincuante agns, cuant che i alpins e dute la int di buine volontât a àn savût frontâ une situazion cetant dramatiche pai nestris paîs.