Contis sot spirt

Chest nol è un libri. Chest a son doi libris.
Se us covente un libri di contis, nome un libri di contis, o vês di lei lis dîs storiis dâur di chestis riis, intituladis cul non dal personaç che lis anime. Se us interesse intivâ il leam che lis tire dongje, o vês di lei ancje la part che si clame “Cui?”, ma nol è un scugnî, e no stait a leile prime des contis, se o vês voie di gjoldilis a plen.
Chel altri libri, invezit, al è un test di narative par students des scuelis superiôrs.
Par chel lis contis a son dutis di gjenars diferents. Par chel a ’nd è dîs contis, come i mês di scuele, e la prime e la ultime a son plui curtis e zuarinis, adatis par Setembar e Jugn. Si inacuarzarês di cjatâ storiis in prime, seconde e tierce persone; al passât remot, al presint e al trapassât prossim; cun dentri diferents nivei di leture e pocadis di riflession. I tescj a no son simpri sempliçs, par struture e lessic, ma nancje masse complès, e a puedin jessi doprâts di un professôr par mandâ a cirî riferiments biografics o di culture furlane. La part che e spieghe il “Cui?”, par chest secont libri, e je indispensabile.
In bande di chest, e fâs part dal lavôr une tierce part, dulà che si spiin citazions e curiositâts e si stice a cualchi aprofondiment didatic.
E a sierâ il lavôr, no podeve mancjâ une provocazion, ancje se di nature poetiche.