SCUELE
XII ZORNADE DE SCUELE FURLANE
Il sium di Zuandomeni: viaç poetic te Udin dai Tiepolo
SABIDE AI 5 DI AVRÎL
Des 9,00 aes 4,00 dopomisdì
Palaç Mantica – vie Manin 18 a Udin
La Societât Filologjiche Furlane e à di pôc publicât un gnûf libri ilustrât pai fruts de golaine di valorizazion dal nestri teritori. Il libri al è in cinc lenghis (talian, furlan, todesc, inglês e sloven), la storie e je stade scrite di Giovanna Zordan e i dissens a son di Barbara Jelenkovich. Dopo Tarvis, Cividât e Aquilee, cheste volte lis autoris nus menin ator pe citât di Udin intun moment une vore interessant di un pont di viste artistic: o sin tal Sietcent e il protagonist de conte al è Zuandomeni, il fi piçul dal pitôr Zuanbatiste Tiepolo.
Ancje nô pe XII zornade de scuele furlane o fasarìn un viaç tal timp e tai lûcs de Udin dal Sietcent par lâ a scuvierzi lis maravei lassadis in citât dai Tiepolo, pari e fi. O cognossarìn lis autoris dal libri, o impararìn cemût doprâlu in classe e cemût interpretâ il cîl a la maniere di Zuanbatiste Tiepolo.
Program de zornade di formazion:
9,00-9,30: regjistrazion dai partecipants e salûts des autoritâts
9,30-10,45: incuintri cum Barbara Jelenkovich e Giovanna Zordan par scuvierzi insiemi il gnûf libri
“Giandomenico sogna | Il sium di Zuandomeni | Giandomenicos Traum | Giandomenico’s Dream”
10,45-11,00: polse cafè cui dolçs preferîts di Zuandomeni
A chest pont il grup dai insegnants iscrits a la XII zornade de scuele furlane al vignarà dividût in doi: un grup al larà ator pal prin turni di visite dai lûcs dai Tiepolo, un altri grup al restarà in Palaç Mantica par fâ un laboratori artistic. Tal dopodimisdì i doi grups si scambiaran par fâ lis stessis esperiencis.
11,00-13,00: visite vuidade “Su lis olmis dai Tiepolo ator par Udin” (prin grup)
laboratori artistic “Il cîl dal Tiepolo” cun Barbara Jelenkovich (secont grup)
13,00-14,00: polse pal gustâ (ghiringhel in palaç Mantica)
14,00-16,00: tour vuidât “Su lis olmis dai Tiepolo ator par Udin” (secont grup)
laboratori artistic “Il cîl dal Tiepolo” cun Barbara Jelenkovich (prin grup)
Ai partecipants al vignarà dât un atestât di formazion par 6 oris daûr des Liniis Vuide MIUR 170/2016.
Par cuistions organizativis a saran dome 50 puescj disponibii.
Si à di iscrivisi dentri di joibe ai 3 di Avrîl lant te sezion ISCRIVITI in cheste pagjine adalt. La iscrizion e je valide dome se us rive la nestre conferme.
La iniziative e je a gratis.