Descrizion
Mai come chest an o sin contents di jessi a Aplis di Davâr pe tierce edizion de Scuele di Avost! Ce che
al è sucedût ca a la fin di Otubar dal an passât nus à fat nassi la esigjence di inviâ une riflession serie
par comprendi alc di plui dal nestri teritori e dai cambiaments in vore. Al è nassût cussì il teme di chest
an: Paisaç ambient e teritori par imparâ a lei ce che nus stâ ator di un pont di viste gjeografic, leterari,
antropologjic, climatic e ancje par imparâ a cjalâlu midiant dal zûc, de tecnologjie, de esperience, des
tecnichis teatrâls o artistichis, miscliçant cognossince e creativitât intune ricete che e vûl alimentâ, come
simpri, la cussience des oportunitâts infinidis dal insegnament dal furlan a scuele.
A son tantis lis personis che a metaran a disposizion la lôr professionalitât e a dutis al va il nestri ringraciament.
Un biel jutori par cheste edizion nus ven de Universitât di Udin e dai siei docents presints ducj i dîs, ma in
maniere particolâr martars ai 27 di Avost cu la gjestion di une zornade interie! Ocasions di no pierdi!
La Scuele di Avost e je un percors di formazion articolât e increditât daûr des Liniis Vuide MIUR 2016-19.
E je vierte ai insegnants di ducj i ordins scolastics (dal asîl nît aes scuelis superiôrs). La partecipazion e je
libare e gratuite: si pues iscrivisi a dut il percors formatîf, dome a une zornade o dome a une o plui lezions. I
timbris te tessare personâl a atestaran lis oris fatis (cui che nol à ancjemò la tessare la varà in cheste ocasion
domandantle tal moment de iscrizion ai 26 di Avost).
Al è pussibil fermâsi e stâ te stesse struture dulà che si ten il cors o in struturis dongje. La prenotazion e lis
spesis par durmî e par mangjâ a son a caric di ognidun dai partecipants.
Si domande di segnâsi ae iniziative (specificant i laboratoris sielts) dentri di martars ai 20 di Avost midiant
de schede di iscrizion in zonte. La schede e va compilade in dutis lis sôs vôs
e inviade ae direzion info@scuelefurlane.it, la iscrizion e je valide dome se us rivarà une rispueste di
conferme, se no clamait il 0432.501598 (int.5).
La iniziative e previôt no plui di 100 iscrits.
Se cualchidun al è interessât a un servizi di centri estîf pai fîs che nus al domandi vie mail e nô o darìn lis
informazions par cjapâ contats direts.
Par vê plui informazions si pues clamâ li dal Docuscuele, des 9:00 aes 13:00 di lunis a vinars al 0432.501598
- int. 5 o scrivint une mail a info@scuelefurlane.it.