Dopo dal sucès de Summer School di furlan par insegnants de scuele de infanzie, primarie e secondarie di prin grât dal an passât, o sin a presentâus il program de seconde edizion. Il lûc al è confermât e cussì o passarìn trê dîs insiemi tal incjant des monts a Davâr, localitât Aplis, par partecipâ a un percors di formazion articolât e acreditade daûr des Liniis Vuide MIUR 2016-2019.
Il program al previôt lezions frontâls cun esperts docents de Universitât e professioniscj che a tignaran aprofondiments di linguistiche, gramatiche, leterature e didatiche, oltri aes ativitâts laboratoriâls che a permetaran di cognossi e meti in pratiche metodologjiis inovativis e buinis pes lis diferentis etâts dai students (art, storie, musiche, tecnichis artistichis, bai tradizionâi, visitis compagnadis tal teritori e elaborazion dai argoments cun tecnichis gnovis oltri adut il rest…).
La partecipazion e je libare e gratuite: si pues iscrivisi a dut il percors formatîf, dome a une zornade o dome a une o plui lezions, i timbris te tessare personâl a atestaran lis oris fatis (cui che nol à ancjemò la tessare la varà in cheste ocasion domandantle tal moment de iscrizion ai 27 di Avost).
Al è pussibil fermâsi e stâ te stesse struture dulà che si ten il cors o in struturis dongje. La prenotazion e lis spesis par durmî e par mangjâ a son a caric di ognidun dai partecipants.
Si domande di segnâsi ae iniziative (specificant i laboratoris sielts)
dentri di lunis ai 20 di Avost midiant de schede di iscrizion. La schede e va compilade in dutis lis sôs vôs e
inviade ae direzion info@scuelefurlane.it, la iscrizion e je valide dome se us rivarà une rispueste di conferme, se no clamait il 0432.501598 (int.5).
La iniziative e previôt
massime 100 iscrits.
Al è disponibil ancje un servizi a paiament par intratignî i fruts (dai 5 ai 10 agns) tes oris des lezions. Il servizi al è organizât de cooperative sociâl Maciao che si pues contatâ al n. 0433 468141 par acuardis direts.
Par vê plui informazions si pues domandâ ae referente dal Docuscuele, dot.e Antonella Ottogalli, clamant des 9:00 aes 13:00 di lunis a vinars al 0432.501598 - int. 5 o scrivint une mail a info@scuelefurlane.it.
DOCUSCUELE al è un progjet finanziât de ARLeF e de Regjon Friûl V.J.
realizât de Societât Filologjiche Furlane
in colaborazion cul Ufici Scolastic Regjonâl FVG