Ancje pal an scolastic che al ven la Societât Filologjiche Furlane e à chê di dâ fûr sore nuie a arlêfs e docents des scuelis primariis dal Friûl Ólmis, il diari bilengâl furlan/talian.
Cun cheste iniziative, inmò une volte sostignude de Regjon Autonome Friûl Vignesie Julie, si ufrìs un imprest didatic impuartant par meti in vore te scuele la tutele de lenghe e de culture furlanis: cheste edizion dal diari si incentrarà sul 50m inovâl dal taramot dal Friûl e su la storie de Protezion Civîl dal Friûl Vignesie Julie, nassude subit dopo, cun ilustrazions di undis professioniscj dal nestri teritori. Propit pai contignûts si domande di prenotâ il diari pes classis III, IV e V des scuelis primariis.
L’obietîf al è chel di rivâ a dâ fûr i diaris dentri dal inizi dal an scolastic 2025-26 cun consegne pai prins di Setembar.
Par chest nus covente di savê dentri dai 15 di Mai dal 2025 trops sono i fruts interessâts, dividûts par classe, e il non dal insegnant/dai insegnants di riferiment.
Par prenotâ i diaris si à di jemplâ il modul in zonte e inviâlu par pueste eletroniche ae direzion dal Docuscuele: info@scuelefurlane.it.
Si vise cun di plui che se il numar des domandis al ves di lâ parsore de disponibilitât, la Societât Filologjiche Furlane e darà fûr lis copiis dal diari daûr l’ordin che a son rivadis lis domandis, cu la distribuzion dome a lis classis III, IV e V de scuele primarie.
Ai insegnants che a cjapin sù il nestri invît o domandìn la plui grande colaborazion par visâ lis fameis che i arlêfs a varan l’Olmis 2025-26 tai prins dîs di scuele e par puartâ in classe il diari tant che supuart didatic midiant de leture e dal ûs pratic dai siei contignûts. Us invidìn ancje a pocâ i arlêfs a pandi, di persone o ben ducj insiemi, un judizi sul diari, e a segnalâ propuestis par argoments di tratâ tes edizions che a vignaran midiant de spedizion (ancje vie mail) dal modul fat a pueste te ultime pagjine dal diari.