Il laboratori al propon un svicinament diferent, creatîf e artistic, ai colôrs, a cemût doprâju. Il fin al è chel di sensibilizâ e disvilupâ la lôr cognossince.
L’invît a sperimentâ il mont cromatic al cjape il vie dai colôrs viodûts tant che individualitâts precisis, ognidune cuntun so moviment interiôr e un so caratar, che si puedin meti dongje ai suns dal lengaç e/o dai struments musicâi.
I zûcs cromatics a puedin tacâ di une emozion interne (pôre, gjonde…) o di atmosferis esternis (par esempli lis stagjons) o ancjemò dai elements (aghe, aiar, tiere e fûc). Al contrari, si pues movisi insiemi cui colôrs par sintî ce che a clamin te nestre memorie o te nestre imagjinazion.
Si invie in cheste maniere un zûc infinît di sinestesie.
Dut chest par jentrâ te anime di une sorte di abecedari dai colôrs e cjapâ sù dute la lôr potenzialitât.
I colôrs cussì a puedin fâ di poie al lengaç verbâl o al mont des emozions, a puedin voltâ di un pont di viste cromatic la secuence di une conte o mostrâ lis sfumaduris des diferentis melodiis dai suns.
Il laboratori al è tignût di Giorgio Pascoli, atîf di plui di 30 agns tal setôr artistic e educatîf.
La tecniche di piture propueste e je chê dal acuarel (cun pigments naturâi) su sfuei umit.
Cheste metodiche artistiche e cjape ispirazion de “Teoria dei Colori” di Goethe, de pedagogjie di R. Steiner e de “Lo spirituale nell’arte” di V. Kandinsky.
formazion daûr des liniis vuide MIUR 2016-2019.
Lis oris a saran segnadis su la tessare dal Docuscuele, impensaitsi di puartâle o di domandâle se no le vês ancjemò.
Formazion a numar sierât: no plui di 20 docents par laboratori (i doi laboratoris a son compagns, us domandìn di segnâsi dome a un dai doi).