FRUTS!
FESTIVAL DE LETERATURE PE INFANZIE IN LENGHE FURLANE_2e EDIZION
dai 18 di Novembar ai 6 di Dicembar
PES SCUELIS, PAI INSEGNANTS E PAI CURIÔS…
PAR LEI E PAR LASSÂSI INMAGÂ DAL SUN DES PERAULIS E DAL LÔR LENGAÇ!
I INCUINTRIS FORMATÎFS PAI INSEGNANTS
LEI IL TERITORI
cun Luigino Peressini
Udin, Palaç Mantica, vie Manin 18 – Joibe ai 29 di Novembar aes 17:00
Un viaç sul nestri teritori di Glemone a Spilimberc, di Martignà a Tramonç, di Udin a Lignan… fra druidis, aganis, drâcs e benandants. La ricercje des tradizions, il dissen e la scriture creative: chescj a son i trê ingredients fondamentâi che Luigino Peressini al met adun tes sôs ricetis che a puartin la magjie e il svolâ libar de fantasie tes classis!
A compagnâ Luigino su chest troi a saran Lieto Molinaro, dirigjent scolastic, Giuliana Massaro, mestre, e Marzia Plaino, bibliotecarie.
IL FURLAN TANT CHE SPAZI DI INCLUSION A SCUELE. SUGJERIMENTS PEDAGOGJICS
cun Davide Zoletto
Udin, sale cunvignis de Fondazion Friûl, vie Manin 15 - Vinars ai 30 di Novembar, aes 17:00
Il furlan tant che spazi interculturâl e di inclusion. La ore di furlan tant che timp ideâl pal confront fra culturis diferentis che a son presintis aromai in dutis lis classis. Lis contis e i libris ilustrâts e scrits in cualsisei lenghe tant che lûc dulà cjatâsi, pont di contat e di scambi vicendevul. Chescj i argoments che il Prof. Davide Zoletto, docent di leterature pe infanzie dal Dipartiment di lenghis e leterature, comunicazion e societât de Universitât di Udin, al frontarà par dâ gnovis prospetivis ai insegnants di furlan.
LEI A VÔS ALTE
cun Monica Aguzzi
San Vît dal Tiliment, Palaç dal Municipi – Sale dal Consei, place dal Popul 38 – Lunis ai 3 di Dicembar
Un apontament di dôs oris plenis par lavorâ insiemi su lis motivazions e i obietîfs de leture a vôs alte, su cemût preparâsi par une leture, su cemût impostâ la vôs par fâ in maniere che in dutis lis scuelis si fasin simpri plui leturis animadis par furlan, par difondi sunôrs, ritmis e espressions de nestre lenghe, par fâ cognossi il patrimoni leterari locâl. Cul jutori di Monica Aguzzi, atore, educadore, formadore di letôrs volontaris e promotore de leture fra i zovins.
I incuintris a son a gratis e increditâts daûr des Liniis Vuide MIUR 2016-2019. I timbris te tessare personâl DOCUSCUELE, a atestaran lis oris fatis (cui che nol à ancjemò la sô tessare al pues domandâle).
Si à di segnâsi cuntune mail a info@scuelefurlane.it (clamâ il n. 0432-501598 int.5 se a la vuestre prenotazion no i ven daûr une rispueste!)