Un simpatic carton animât par furlan al insegne ai fruts cemût lavâsi ben lis mans
Un grant crot e une piçule moscje, cu lis vôs di Claudio Moretti e di Elvio Scruzzi, par imparâ cun divertiment lis regulis di igjiene
Si invie cu la innomenade naine furlane “Ursule parussule” il gnûf carton animât de ARLeF - Agjenzie Regjonâl pe Lenghe Furlane che al insegne ai fruts regulis impuartantis di igjiene, simpri plui fondamentâls in dì di vuê.
Protagoniscj a son Free e Ulli: un grant crot e une piçule moscje, personaçs che i fruts a àn imparât a volêur ben cu la trasmission televisive “Maman!”.
Te storie “Free&Ulli e lis besteatis”, chescj doi personaçs simpatics si lavin ben lis mans: ai fruts ur bastarà imitâju par fâlu te maniere juste e pal timp che al covente. Cui lôr esemplis, imparâ altris abitudins sanis al sarà un zûc pardabon divertent.
Free e Ulli a nassin de fantasie de ilustradore Patrizia Geremia e a dan vite aes storiis de golaine di libris editade di Futura Edizioni, che la ARLeF i à afidât ancje la creativitât di cheste serie “speciâl”.
Lis vôs prestadis ai personaçs a son chês di doi atôrs furlans cognossûts, Claudio Moretti e Elvio Scruzzi, intant che la vôs che e conte e je chê di Daria Miani, compagne di zûcs e di aventuris tant amade dai frutins, e condutore de famose trasmission Maman! dulà che Free e Ulli a son di cjase.
“Il progjet – al spieghe il president de ARLeF, Eros Cisilino – al è nassût de colaborazion cu la Protezion civîl regjonâl, sul imprin tant che schede a fumets. Ma, sigûrs de simpatie e soredut de empatie che i doi personaçs a varessin alimentât tra i frutins, o vin inviât dal moment ancje la realizazion dal carton animât: al è chest, dal sigûr, un strument ancjemò plui valit par incoragjâ i fruts a cjapâ sù tantis abitudins coretis. Cumò lu metìn a disposizion di ducj chei comuns dal teritori furlan che a volaran condividilu midiant dai lôr canâi di comunicazion. Il nestri obietîf al è chel di metisi dongje dai gjenitôrs, dai nonos e dai insegnants che a son impegnâts tal percors fondamentâl di educazion ae salût dai frutins. Doprâ il furlan al rint il messaç plui diret, ma soredut al sburte a chel aprendiment plurilengâl che, come che a disin i studis sientifics, al puarte cun se vantaçs grandonons, e tra chei un disvilup cognitîf plui grant e la pussibilitât di jessi plui pronts ai cambiaments”.
https://arlef.it/it/free-e-ulli-e-lis-besteatis/#