Ancje pal an scolastic che al ven la Societât Filologjiche Furlane e darà fûr sore nuie a arlêfs e docents des scuelis primariis dal Friûl Ólmis, il diari bilengâl furlan/talian.
Cun cheste iniziative, inmò une volte sostignude de Regjon Autonome Friûl Vignesie Julie, si ufrìs un imprest didatic impuartant par meti in vore te scuele la tutele de lenghe e de culture furlanis: cheste edizion dal diari si incentrarà sul 50m inovâl dal taramot dal Friûl e su la storie de Protezion Civîl dal Friûl Vignesie Julie, nassude subit dopo, cun ilustrazions di dîs professioniscj dal nestri teritori.
Pal prossim an scolastic o podìn garantî la distribuzion dal diari Olmis a ducj i arlêfs da lis classis III, IV e V des scuelis primaris e ai insegnants che a àn mandât la schede di prenotazion.
I diaris a saran consegnâts dentri dai prins dîs di Setembar daûr da lis modalitâts comunicadis ai Istitûts Comprensîfs cuntune letare a pueste.
O domandìn ai insegnants des classis III, IV e V dal a.s. 2025-2026, che a san di vê fat domande dai diaris, di visâ lis fameis che i fruts a cjataran i Olmis a Setembar cence bisugne di comprâ un altri diari, parcè che nol è nuie di plui biel dal Olmis cun dutis lis sôs ativitâts!!!