Il volum al è une antologjie didatiche e e rapresente il risultât di un ambiziôs progjet nassût dentri dal grop di lavôr pal furlan curicolâr di Collinrete, formât dai referents pe lenghe furlane di siet Istitûts Comprensîfs (Basilian e Sedean, Buie, Feagne, Glemone, Maian e Forgjarie, Pagnà - Martignà e San Denêl).
La opare e je struturade in trê sezions:
- poesiis, dulà che la sielte di 9 autôrs e autoris e torne a percori dut il Nûfcent;
- prose dulà che ai 10 classics si alternin 3 autôrs contemporanis e ancjemò atîfs;
- oparis voltadis par furlan dulà che a comparissin tocs de leterature taliane di fin Votcent voltâts par furlan di Pre Antoni Beline e Roberto Jacovissi.
I curadôrs a dedichin cheste antologjie didatiche al professôr Gino Marco Pascolini, che cussì si augurave:
Us racomandi di tignî dûr cu la poesie, che e zove a cjalâ lis robis cun voli profont, di tignî dûr cu la lenghe furlane, imparantle simpri miôr, cu la leture di tantis bielis oparis di une leterature siore e antighe.
La lenghe furlane e je un vistît che o podês doprâ di fieste e di dîs de vore a cjase come intal forest.