Il diari bilengâl Ólmis al compagne i nestris fruts a scuele di passe trente agns, puntuâl a presentâur gnovis esperiencis par capî miôr l’ambient, la storie, lis tradizions e l’identitât dal Friûl. Ólmis al reste un pont di riferiment ancje pai mestris e pai gjenitôrs, un aiût impuartant par rifleti su la nestre realtât e sui cambiaments che il mont ogni dì nus propon, une ocasion par resonâ su la dimension di un teritori, il nestri, che i zovins simpri di mancul a vivin e a cognossin.
Ogni an l’Ólmis al trate un argoment particolâr. Cheste volte il diari nus fevele di sciencis, une materie impuartantone pe formazion dai zovins, e lu fâs cu la colaborazion di Letizia Diamante, furlane e divulgadore sientifiche a Cambridge, che nus propon osservazions e curiositâts su lis stagjons, sul mont des bestiis e des plantis, sul colôr des fueis, su la nêf e altris robis ancjemò. Altre novitât di chest an e je l’introduzion dal inglês, une lenghe simpri plui impuartante pe comunicazion in dut il mont: la nestre vuide al è un simpatic cunin cu la bandiere inglese, ch’al cjacare trê lenghis e al seguìs dutis lis ativitâts che a son presentadis tes pagjinis dal diari.
Lis ilustrazions a son curadis di Elena Veronesi, ancje jê furlane, ilustrazions ch’a rivuardin ducj i dîs mês e cun di plui i stickers, i piçui adesîfs che pe prime volte il diari ur regale ai fruts. Al è un regâl che propit i fruts nus al àn domandât, i stickers, compilant la schede di valutazion ch’e siere il diari: a chei che nus mandin la schede, tra l’altri, ur rive a cjase un dai nestri libris pai fruts.