Ason trente agns che il diari Ólmis al compagne i nestris
fruts sui trois de vite, une vite fate di esperiencis e di sorpresis, di amîs e di valôrs.
Al è un diari “torzeon”, come
che nus dîs il titul, un diari che i plâs di lâ ator pal Friûl e pe sô storie, un
diari curiôs, un barcon viert sui mil e mil moments ch’a componin la nestre
realtât.
Come ogni an l’Ólmis nus presente cualchi aspiet particolâr dal mont, dal
ambient là ch’o sin a stâ, da lis tradizions che nus lein ae nestre tiere. E
propit lis tradizions popolârs a fasin di corone al diari, contant di aspiets
particolârs dai ûs ancjemò praticâts tra Dimpeç e Concuardie, tra Udin e
Pordenon, tra Claut e Çurçuvint.
La cineprese di Olivia Averso Pellis, che nus
à lassât un tesaur di filmâts zirâts in Friûl te prime metât dai agns Setante
dal Nûfcent, e je li a testemoneâ il percors di ricercje suntune
ereditât culturâl che di une gjenerazion a chê altre e je destinade a gambiâ.
I tescj des diviersis tradizions a son curâts di Marta
Pascolini.