Il volum al è une antologjie di cjantis ineditis scritis e musicadis di Arianna Plazzotta, esperte di didatiche musicâl cun passe 20 agns di formazion Orff e Kodaly.
Il libri al vûl
jessi un strument pai insegnants des scuelis de
infanzie e des primariis, ma ancje par chei che a lavorin intes
scuelis di musiche, intes scuelis secondariis di prin grât e cui côrs
di vôs blancjis, stant che i cjants metûts adun in chest libri
a son presentâts in plui versions, in mût di podê insegnâju a
arlêfs cun etâts e competencis musicâls diferentis.
I tescj a son
dedicâts a diviers aspiets de vite dai fruts, scolastiche e no, come lis
fiestis, il passâ des zornadis, dai mês e des stagjons, i numars, lis bestiis,
e tantis altris robis, cuntun indiç tematic che al vuidarà i insegnants inte
sielte dai tocs. Dongje dai tocs si podaran cjatâ zuguts e ativitâts par rindi
l’aprendiment plui vast e multidissiplinâr.
Al sarà presint
ancje un “indicadôr di dificoltât” par vuidâ i docents inte sielte dai tocs di
proponi ai lôr arlêfs, daûr de lôr etât e des lôr esperiencis musicâls.
Sot di ogni cjant si
cjate un QRcode par podê scoltâ il toc cjantât e la base musicâl (in diviersis
tonalitâts) par facilitâ l’aprendiment, se al ves di jessi propit impussibil vê
un acompagnament strumentâl.
Cun cheste
antologjie o volìn ufrî ai insegnants che a cirin materiâl gnûf un strument
valevul e facil di doprâ, che al fasi svicinâ i fruts a la musiche in maniere
lizere e gustose, par rindi l’insegnament de musiche e dal furlan un moment
plasevul e significatîf in te vite scolastiche dai nestris fruts.