La “Scuele di Avost” e je un percors di formazion par insegnants che chest an e rive a la sô novesime edizion. E ven inmaneade dal DOCUSCUELE – Centri regjonâl di documentazion ricercje e sperimentazion didatiche pe scuele furlane, ven a stâi il servizi par la scuele de Societât Filologjiche Furlane.
Si trate di un cors di inzornament increditât daûr des Liniis Vuide MIUR pai insegnants de scuele de infanzie, primarie e secondarie di prin grât.
La partecipazion e je libare e gratuite. Si pues iscrivisi a dut il program, dome a une zornade, dome a une ativitât a seconde des vuestris disponibilitâts.
A la fin ognidun dai insegnants al varà il so atestât di formazion daûr da lis oris fatis. Dut il percors di formazion al è par 15 oris.
Lis ativitâts a son prime di dut pai insegnants, ma a son benvignûts ancje familiârs e amîs, curiôs di cognossi il nestri teritori.
Si à di iscrivisi a la Scuele di Avost 2025 dentri di joibe ai 21 di Avost jemplant la schede di iscrizion che si discjame dal nestri sît www.scuelefurlane.it te sezion specifiche des gnovis. La schede e va compilade in dutis lis sôs vôs cun particolâr atenzion ae sielte da lis ativitâts di fâ e dopo e va inviade a la direzion di pueste info@scuelefurlane.it. La iscrizion e je valide dome se us rivarà une rispueste di conferme.
Ognidune des ativitâts e à un limit di partecipants, l’unic criteri al è chel dal ordin di rivade de schede di iscrizion. Si domande ancje di visâ il prime pussibil tal câs di impediment a partecipâ par dâ il puest a cualchidun altri.
Vinars ai 22 di Avost des 9,30 aes 13,00
cun increditament dai partecipants des 9,20
AQUILEE, MUSEU ARCHEOLOGJIC NAZIONÂL (via Roma 1)
No plui di 30 iscrits
Salûts de dot.e Marta Novello, Diretore dal Museu
IL MUSEU IN ZÛC
cun Elena Braidotti
Il Museu di Aquilee nus vierç lis puartis par mostrânus ce che i sta daûr:
• la logjiche dal gnûf alestiment che al mene i visitadôrs intun rût zîr te citât antighe di Aquilee,
• i dipuesits e la aule didatiche cun
• la programazion pal 2025-2026 de ufierte formative pes scuelis (EducA – Servizio educativo del sito UNESCO di Aquileia) e
• la presentazion di “Il Museu in zûc”, i gnûfs materiâi didatics in plui lenghis par une visite ative tal Museu (i materiâi a saran dâts fûr ai partecipants)
IL TESAUR DI AURELIANO
cun Barbara Jelenkovich
Un libri ilustrât pai fruts in cuatri lenghis par fâ un zîr pes stradis di Aquilee in compagnie di Aurelianus, Hermes, Rufus e Saturninus, cuatri fantacins che nus mostrin la basiliche, il forum, une cjase, il puart, la taverne, il marcjât, lant fin li dal canelâr dilunc dal flum… une Aquilee rapresentade tal detai gracie al lavôr filologjic fat di une grande ilustradore: Barbara Jelenkovich, 40 agns di cariere te editorie cun plui di 200 libris fats in dut il mont in 42 lenghis diferentis. Barbara nus mostrarà cemût lei e doprâ chest imprest didatic par insegnâ une pagjine fondamentâl de nestre storie.
Lunis ai 25 di Avost des 9,30 aes 17,30
cun increditament dai partecipants des 9,30 e polse pal gustâ des 12,30 aes 14,00
UDIN, PALAÇ MANTICA - SEDE DE SOCIETÂT FILOLOGJICHE FURLANE (vie Manin 18)
No plui di 50 iscrits
Des 9,45 aes 12,30
Salûts dal Prof. Federico Vicario, President de Filologjiche
“SAPERI AL SETACCIO”: LE UNITÀ DIDATTICHE DI APPRENDIMENTO
Ada Bier
Introduzion metodologjiche ai materiâi
Linda Facini e Anna Zossi
A ogni plat la sô stagjon! Presentazion de U.D.A. 1
Tamara Pozzebon
Vite e vitis dai ogjiets. Presentazion de U.D.A. 2
Donatella Bella
Lis lidrîs di une civiltât. Presentazion de U.D.A. 3
Ada Bier
Conclusions: pussibilitâts operativis
(la publicazion e vignarà dade fûr ai partecipants)
Des 2,00 aes 3,30 di dopomisdì
• OLMIS 2025-2026 Diari torzeon par cognossisi e fâsi cognossi
La Protezion Civîl e i 50 agns dal Orcolat
Presentazion e laboratori cul DOCUSCUELE
Par insegnants di scuele primarie
(il diari al vignarà dât fûr ai partecipants)
• BUINE GNOT TEO | BUONANOTTE TEO | GOOD NIGHT THEO
Presentazion dal libri ilustrât pai fruts (3-8 agns) e laboratori cun Barbara Jelenkovich, autore des ilustrazions
Par insegnants di scuele de infanzie e primarie (prin cicli)
(il libri, publicât de SFF, al podarà jessi comprât in sede ancje cu la cjarte dal docent)
Des 4,00 aes 5,30 di dopomisdì
LA TV DAI FRUTS
Presentazion cun Arianna Zani dai prodots televisîfs realizâts de RAI FVG pai plui piçui: “Nine e Olghe” e “Juli cunin” tant che imprescj pe didatiche a scuele.
Laboratori “L’ABC dal dopleadôr” cun Serena Fogolini
Martars ai 26 di Avost des 9,30 aes 17,00
cun increditament dai partecipants des 9,30 e polse pal gustâ des 13,00 aes 14,30
GURIZE, CJASE ASCOLI - SEDE DE SOCIETÂT FILOLOGJICHE FURLANE (vie Graziadio Isaia Ascoli 1)
No plui di 30 iscrits
Des 9,30 aes 12,30
SCONFINAMENTS: ae scuvierte de Gurize e Gnove Gurize, capitâl europeane de culture 2025
Sot la vuide di ecezion dal Diretôr de Filologjiche o larìn a la scuvierte di lûcs che a contin la storie di une tiere di frontiere: il convent francescan de Castagnevize, la place principâl di Gnove Gurize, Salcan cul sô puint, la Place Transalpine e tant di plui… Une biele cjaminade intun percors a anel cun partence e rivade li de sede gurizane de Filologjiche in Cjase Ascoli.
Us conseìn di lassâ la machine tal splaç di vie Italico Brass e di lâ sù par lis scjalis che a puartin dret in vie Ascoli. Us racomandìn ancje scarpis e vistîts comuts, aghe e tante voie di cjaminâ parcè che il zîr al à une durade di uns dôs oris.
Des 2,30 aes 4,30 di dopomisdì
DIZIONARIO DEI GORIZIANI
Presentazion de publicazion, editade de Societât Filologjiche Furlane cun contignûts didatics, par cure de autore, la Prof.e Elisa Brumat.
LIS LENGHIS DI GURIZE
Visite ae mostre permanente di Cjase Ascoli su Gurize tant che lûc di passaç e di incuintri di popui e di culturis diferentis.