STRAordenaris. Un fumut par contâ la Protezion Civîl ai fantats
Il blu al è il colôr dal cîl, dal mâr, de bandiere de Union Europeane e dal Friûl, ma e je une altre sfumadure di blu che si è fate cognossi simpri di plui intai ultins timps: chê dal logo de Protezion Civîl dal Friûl Vignesie Julie.
Une realtât ben insedade intal imagjinari dai nestris paîs, scuasit scontade, ma che, magari cussì no, e je nassude di un moment tragjic e dramatic de nestre storie, par dopo cressi a nivel statâl intune struture fondamentâl pe sigurece dai nestris paîs, e no dome. Une dimostrazion straordenarie de fuarce de solidarietât a tacâ dal bas, in gracie dal impegn e de cussience di tancj volontaris, pronts a sacrificâ part dal propri timp par cjapâsi cure de comunitât.
Un esempli virtuôs di fâ cognossi ancje intes scuelis, par promovi i valôrs positîfs dal volontariât e il sens civic intai fantats.
Al è propit cun chest intindiment che il Docuscuele – Centri regjonâl di documentazion, ricercje e sperimentazion didatiche pe scuele furlane – al à realizât “STRAordenaris”, un fumut bilengâl par talian e par furlan, cun storie di Barbara Cancian e dissens di Aretha Battistuta.
La publicazion, cun presentazion di Riccardo Riccardi, Assessôr Regjonâl ae Salût, Politichis Sociâls e Disabilitât, delegât ae Protezion Civîl, e mostre al zovin letôr une panoramiche su la Protezion Civîl dal Friûl Vignesie Julie, marcant i siei valôrs di fonde. Une part de storie e je stade dedicade al Orcolat dal 1976 e ae ricostruzion dal Friûl, biel che une altre part e piture lis specificitâts dai atôrs che a fasin part dal sisteme integrât di Protezion Civîl, dai dipendents ai volontaris dai Grups comunâi e des associazions.
In gracie dal lengaç sempliç e de tecniche di ilustrazion une vore simile ae grafiche dai videozûcs, il fumut al rive a fâ prese su la imagjinazion dai fantats, che si lassin cjapâ des aventuris di doi lôr coetanis, Tomâs e Catine, biel che intal dran dran di ducj i dîs, adun cu la mame Bea, si cjatin a vê a ce fâ, cence savêlu, cui vêrs protagoniscj de Protezion Civîl: i volontaris.