Dopo de esperience de antologjie didatiche Peravali’ metude in vore dilunc dal an scolastic 2019/2020, il grup di
lavôr di Collinrete si è misurât te realizazion di Art par furlan, une racuelte inedite di schedis didatichis par imparâ a cjalâ lis oparis di art dal Friûl.
La opare e à doi intindiments: di une bande supuartâ l’insegnament de lenghe furlane e la cognossince dal patrimoni locâl, di chê altre sugjerî une metodiche divierse di chê tradizionâl al studi de storie de art.
L’imprest, pensât pai arlêfs de scuele secondarie di prin grât, al pues dut câs jessi justât ancje par chei altris grâts scolastics: la idee di fonde e je chê di lâ sore nozionisim e lezions frontâls cuntune didatiche laboratoriâl e ribaltade che e stimoli l’arlêf a cjalâ la opare di art e a costruî il so aprendiment condividint lis sôs ideis cui compagns.
Art par furlan e à 70 schedis didatichis, ognidune dedicade a une divierse opare presinte tal panorame artistic furlan,
metudis in ordin cronologjic des origjins (fondazion di Aquilee tal 181 prin di Crist) fin al dì di vuê (Nûfcent).
Ogni schede e propon trê sezions: Imagjin, Cognossincis clâfs e Domandis par capî la opare.
La imagjin de opare, che
e à dongje cualchi informazion essenziâl (autôr, titul, date, tecniche, dimensions, colocazion), e je il centri de schede e
ator di jê si svilupe il dialic tra docent e arlêf; lis cognossincis clâf, proponudis sedi par furlan che par talian, a son tescj une
vore curts che a àn cualchi informazion utile par incuadrâ la opare e l’autôr te corint di riferiment o par sugjerî a chel
che al cjale cualchi ferade di riflession; lis domandis vuide a son la vere novitât de propueste didatiche par vie che par
mieç di lôr il student, insiemi cul insegnant, al svilupe lis sôs capacitâts di osservâ, descrivi, lei e capî in mût critic lis oparis
di art proponudis.