CORS IN LINIE PAR IMPARÂ A SCRIVI PAR FURLAN
dai 15 di Dicembar dal 2020
La prime edizion dute in linie dal cors par imparâ a SCRIVI par furlan
Il prin cors su la gnove plateforme MOODLE pal e-learning dal Docuscuele
Un grup di docents pardabon unic
Un cors increditât daûr des liniis vuide MIUR cun atestât finâl bon par iscrivisi te liste regjonâl
La pussibilitât di stâ daûr a lis lezions cuant che si à il timp par fâlu
Une metodologjie inovative par imparâ une lenghe
Esperts a disposizion par ducj i dubis
Us covential alc altri par lâ subit tal nestri sît pe iscrizion?
Un moment… Leìn ben ancje ca sot
Il Docuscuele – Centri regjonâl di documentazion ricercje e sperimentazion didatiche pe scuele furlane
al organize la prime edizion in linie su plateforme Moodle dal cors di lenghe furlane par insegnants di ducj i ordins di scuele (de scuele de infanzie ae secondarie di secont grât).
Il cors al vûl dâ ai docents lis competencis necessariis di gramatiche – fonologjie, morfologjie e sintassi – par podê doprâ in maniere juste la lenghe furlane scrite. Par chest si zovarà dai insegnants plui preparâts cun titui academics specifics par garantî la cualitât alte dal percors di formazion proponût, che si insiorarà ancje di elements di storie de lenghe, semantiche, linguistiche comparade, toponomastiche, storie dal Friûl. E dut chest si disviluparà lant daûr des metodologjiis plui valevulis par imparâ une lenghe come l’ûs des mapis mentâls par memorizâ miôr e la metodologjie indutive par compagnâ il corsist intun percors di scuvierte graduâl: de osservazion autonome dai câs par cirî di ricognossi la regule, al metisi in zûc cun esercizis sempliçs par verificâ se la ipotesi fâte e stâ in pîts, fin a cognossi la regule in ducj i siei detais in gracie de spiegazion di tutors esperts che a gjavaran ducj i dubis!
La direzion sientifiche e je di Franco Finco, che al coordene une scuadre di nivel cun dentri Ada Bier, Fabio Boltin, Linda Picco, Maria Chiara Visintin e Gabriele Zanello.
Il cors si articole in 4 modui:
- Fonologjie
e grafie furlane
- Morfologjie nominâl
- Morfologjie verbâl
- Morfologjie pronominâl
Ogni modul al è organizât su 4 setemanis di ativitâts (input di riflession, video lezions, esercizis, aprofondiments…) cuntune verifiche finâl.
Il cors al è a gratis. Pe prime edizion a son previodûts no plui di 50 partecipants. Par notâsi si à di compilâ la schede che si cjate sul nestri sît www.scuelefurlane.it, jentrant tal spazi dedicât al cors SCRIVI diretementri de pagjine principâl. La iscrizion e vignarà confermade di une mail di riscuintri, cence il riscuintri la iscrizion no je valevule.
Il cors al è ricognossût par 30 oris daûr des liniis vuide MIUR cuntun atestât a pueste.
La prime lezion di presentazion dal cors si tignarà martars ai 15 di Dicembar aes 17,30 su plateforme zoom. Il codiç di acès al sarà mandât ai 50 iscrits.
Par vê plui informazions si pues scrivi a info@scuelefurlane.it