Ancje pal an scolastic che al ven la Societât Filologjiche Furlane e à chê di dâ fûr sore nuie a arlêfs e docents des scuelis primariis e mezanis dal Friûl Ólmis, il diari bilengâl furlan/talian.
Cun cheste iniziative, inmò une volte sostignude de Fondazion Friuli, si ufrìs un imprest didatic impuartant par meti in vore te scuele la tutele de lenghe e de culture furlanis; cheste edizion dal diari si incentrarà su la gjeografie dal Friûl.
L’obietîf al è chel di rivâ a dâ fûr i diaris vie pe Istât dentri dal mês di Lui, si che nus covente di savê dentri dai 14 di Mai dal 2021 trops che a son i fruts interessâts, dividûts par classe, e il non dal insegnant di riferiment.
Par prenotâ i diaris si à di jemplâ il modul in zonte e inviâlu par pueste eletroniche ae direzion info@filologicafriulana.it.
Si vise cun di plui che se il numar des domandis al ves di lâ parsore de disponibilitât, la Societât Filologjiche Furlane e darà fûr lis copiis dal diari daûr l’ordin che a son rivadis lis domandis, cu la distribuzion a lis classis III, IV e V de scuele primarie e a lis classis I e II de scuele secondarie di prin grât.