La ARLeF e l’USR a presentin Lenghis.me
Ilustrâts a dirigjents e insegnants i contignûts e lis carateristichis dal sît pe didatiche par furlan, talian e inglês, pensâts pe scuele a tacâ de primarie
Joibe ai 21 di Novembar dal 2019, la ARLeF e l'USR-Ufici Scolastic Regjonâl a presentin Lenghis.me, il strument informatic complet di lezions, tescj e esercizis, che al ufrìs grandis potenzialitât pe didatiche de lenghe furlane, taliane e inglese, intune prospetive plurilinguistiche.
La iniziative e je indreçade ai insegnants e ai dirigjents des scuelis primariis e secondariis di prin grât dal Friûl. A ilustrâ i contignûts e lis carateristichis di chest gnûf supuart interatîf, cun tancj esemplis pratics utii par capînt l'ûs, a saran Annalisa Galati e Dario Chialchia, doi tra i insegnants che a àn partecipât al progjet. La conference di presentazion si fasarà des 17.00 aes 19.00, te Aule Magne dal Liceu Sientific “G. Marinelli”, in viâl Leonardo da Vinci 4, a Udin.
Disponibil su internet in forme gratuite, il strument al è finanziât de ARLeF - Agjenzie Regjonâl pe Lenghe Furlane e realizât dal Claap - Centri di Linguistiche Aplicade “Agnul Pitane”.
Lenghis.me al nas de volontât dai sogjets promotôrs di ufrî un percors di didatiche eficace e moderne, in stât di sostignî i insegnants cun materiâi za pronts pal ûs, tant che i sussidiaris digjitâi pal prin cicli de scuele primarie pe aree linguistiche e pe aree matematiche e siencis. L'obietîf al è ancje chel di valorizâ risorsis, progjets e materiâi che a puedin inricjî il strument e furnî ai docents interessâts la pussibilitât di cjapâ part ative tal disvilup dal supuart. Cun di plui, e je in progjet la realizazion di une biblioteche didatiche digjitâl complete par dutis lis dissiplinis e par dutis lis classis de scuele dal oblic.
Par notâsi ae conference di presentazion:
http://www.scuola.fvg.it/usr/fvg/USRFVG/Iscrizioni/2019_insegnantiLenghis