CORS PAR INSEGNANTS
LA EDUCAZION PLURILENGÂL
INTE SCUELE DE INFANZIE
par cure di Fabiana Fusco, Serena Martini e Gabriele Zanello
LUNIS AI 5 DI MAI
Carateristichis neurocognitivis dal bilinguisim intai fruts di etât prescolâr
ANDREA MARINI
Universitât di Udin
MARTARS AI 13 DI MAI
Organizâ i intervents pal aprendiment linguistic inte scuele de infanzie
FEDERICA RICCI GAROTTI
Universitât di Trent
LUNIS AI 19 DI MAI
Lis lenghis in azion cul gnûf Cuadri comun european di riferiment pes lenghis (CEFR)
ENRICA PICCARDO
University of Toronto
MIERCUS AI 21 DI MAI
“Leterature a colôrs” di cualitât pe scuele de infanzie
SILVIA BLEZZA PICHERLE
Universitât di Verone
MIERCUS AI 28 DI MAI
Il furlan inte scuele de infanzie: analisi de situazion e prospetivis di lavôr
ADA BIER
Universidad del País Vasco / Euskal Herriko Unibertsitatea
La scuele de infanzie e à une impuartance fondamentâl inte suaze de educazion linguistiche. Di fat, e je il prin ambient educatîf li che i fruts a scomencin a cjapâ su lis competencis linguistichis di fonde, come la capacitât di scoltâ, capî e fevelâ. L’ûs dal lengaç ur permet ai fruts di tacâ a organizâ lis propriis ideis, esprimi emozions e relazionâsi cun chei altris, no dome esercitant la creativitât e il pinsîr critic, ma ancje prudelant la espression individuâl. In chest mût a imparin ancje a interagjî cui compagns de stesse etât e cui adults, disvilupant competencis sociâls che si fondin la plui part su lis capacitâts di comunicâ cun eficacie.
Se par un viers al è une vore impuartant che inte scuele de infanzie i fruts di divignince linguistiche divierse a puedin cjapâ su o infuartî la cognossince de lenghe taliane – che e je determinant pal lôr sucès scolastic –, par un altri viers al è fondamentâl che chest aprendiment nol mortifichi lis lenghis nativis (locâls o di migrazion) dai fruts. Di fat, une educazion linguistiche di cualitât inte scuele de infanzie e à di garantî che ducj i fruts, in mût indipendent de lôr origjin familiâr o culturâl, a vedin oportunitâts compagnis par imparâ, valorizant e disvilupant ancje lis propriis cognossincis linguistichis.
Il cors al intint meti a fûc i procès di acuisizion e aprendiment linguistic relatîfs ae scuele de infanzie, cuntune atenzion particolâr pal contest plurilengâl dal Friûl. Cun dut che te istruzion prescolâr la lenghe furlane e ven sielzude par frutis e fruts di une percentuâl une vore alte di fameis, si pues fâ ancjemò tant parcè che e vegni cjapade sù o rinfuarcide in mût naturâl e atratîf, divertent e spontani, metint jù lis fondis par un aprendiment continui e par une socializazion primarie che e cjatedi ancje intal furlan un dai ponts di fuarce.
DAI 5 AI 28 DI MAI 2025, ORIS 17-19, PLATEFORME TEAMS