Dopo des cuatri fortunadis edizions dal cors "Fare CLIL par furlan" o vin scoltât lis tantis vôs dal mont de scuele che nus domandavin une formazion di nivel avanzât su la metodologjie CLIL par imparâ a produsi materiâi, a doprâju in classe e a valutâ l'impat sui arlêfs.
Tacant de fin di Otubar, al partìs un gnûf cors che al larà indenant fin tal mês di Mai dal 2023 cun 8 incuintris, dulà che docents universitaris esperts di CLIL a daran lis diretivis pe realizazion di unitâts didatichis che a saran publicadis suntun gnûf volum de golaine "I Cuaders dal Docuscuele".
Il percors al è pai insegnants de scuele primarie, secondarie di I e II grât. A podaran partecipâ dome 20 insegnants che si impegnaran a puartâ fin insom dute la ativitât formative e di produzion dai materiâi.
Si domande di vê une buine cognossince dal furlan scrit e fevelât e di vê une cognossince almancul di base de metodologjie CLIL. Par chest us domandarìn di compilâ une schede di iscrizion dulà specificâ i cors di formazion che o vês fat sedi sul furlan che sul CLIL. Cui che nol à vût la pussibilitât di fâ une des cuatri edizions dal cors "Fare CLIL... par furlan", che o vin proponût tal 2018 e 2019 in colaborazion cu la Universitât di Ca' Foscari, al varà mût di viodi i video e i materiâi, disponibii te plateforme Moodle.
Il cors al è in linie su Moodle e Zoom cun lezions in modalitât sincrone e ativitâts asincronis cu la assistence di tutors espertis, prontis a dâ une man pe realizazion di unitâts didatichis di aprofondiment suntun specific argoment che o decidarìn sul tacâ dal cors. Un lavôr di scuadre par cressi insiemi tal zîr di cualchi mês e cul jutori di professioniscj dal mont academic e de scuele par viodi concretizâsi l'impegn di ducj tra lis pagjinis di un biel volum de "I Cuaders dal Docuscuele" (viôt chei altris volums za publicâts ca sot tra lis publicazions).
Il percors di formazion nol previôt coscj di bande dai iscrits, ma dome l'impegn tal puartâlu fin insom!
Ae fin ognidun al varà un atestât di formazion daûr des liniis vuide MIUR.
Lei ben dutis lis informazions sul cors scjariant il volantin, compile la schede di iscrizion, che tu cjatis in zonte a cheste pagjine, e mandile dentri dai 20 di Otubar a info@scuelefurlane.it.
Par cualsisei dubi claminus o scrivinus une mail!