Cul 2025 e scomence une gnove aventure formative indreçade a ducj i docents dai cors pratics di lenghe e culture furlane de Societât Filologjiche Furlane e a ducj i insegnants in servizi che magari un doman a podaressin jessi interessâts a slargjâ la scuadre dai docents dai cors pratics!
In gracie di 9 incuintris, dal mês di Zenâr al mês di Març i partecipants a podaran cognossi miôr aspiets peâts a storie, toponomastiche, leterature, musiche e tradizions popolârs dal Friûl.
I incuintris si tignaran di 5 e mieze daspò misdì a 7 e mieze di sere, te sede de Societât Filologjiche Furlane e in linie. Lis regjistrazions a vignaran cjamadis te plateforme moodle de formazion de SFF, li che si cjataran ancje i esercizis e la bibliografie des lezions.
La partecipazion e je sore nuie. Si domande une buine cognossince de lenghe furlane. Ae fin, a ducj i partecipants ur vignarà dât fûr un atestât di frecuence dal cors di formazion, increditât daûr des Liniis Vuide MIUR , par un totâl di 26 oris.
Il percors formatîf al è inmaneât de Societât Filologjiche Furlane, in colaborazion cul Docuscuele e cul finanziament de ARLeF - Agjenzie Regjonâl pe Lenghe Furlane.
Par informazions e par iscrizions, clamâ il numar 0432.501598 (int. 6) o ben scrivi a docuscuele@scuelefurlane.it
Ve ca il calendari des lezions:
JOIBE AI 23 DI ZENÂR DAL 2025
COGNONS DAL FRIÛL
cun Enos Costantini
MARTARS AI 04 DI FEVRÂR DAL 2025
INTERCULTURALITÂT
cun Angelo Floramo
JOIBE AI 13 DI FEVRÂR DAL 2025
LETERATURE FURLANE
cun Gabriele Zanello
JOIBE AI 20 DI FEVRÂR DAL 2025
TRADIZIONS POPOLÂRS
cun Marta Pascolini
JOIBE AI 27 DI FEVRÂR DAL 2025
STORIE ANTIGHE
cun Mirta Faleschini
JOIBE AI 06 DI MARÇ DAL 2025
STORIE CONTEMPORANIE
cun Walter Tomada
JOIBE AI 20 DI MARÇ DAL 2025
TOPONOMASTICHE
cun Franco Finco
JOIBE AI 27 DI MARÇ DAL 2025
RESTITUZION FINÂL