Event - Ativitât

Ti conti il Vajont

dal 14/10/2021
al 18/11/2021
Telefon
0432 501598 (int. 5)
Descrizion

Ti conti il Vaiont

 

Un percors par tignî impiât un ferâl suntune des tragjediis plui grandis provocadis dal om e par passâ il testemoni de memorie aes gnovis gjenerazions, intune vision che si slargje a plui dissiplinis e che e nas propit de peraule “VAJONT”: VAL, ALAGÂ, JESSI, ORLOI, NEGLIGJENCE, TESTEMONEANCE.

 

INCUINTRIS FORMATÎFS PAI INSEGNANTS

 

Joibe ai 14 di Otubar dal 2021 des 5 daspò misdì aes 7 di sere

VAL
Il Cjanâl da la Ciline, intal so jessi di crets e di boscs, al rivoche di savês platâts inte nature e di peraulis de forme antighe. Adun cun Antonio Cossutta, gjeolic e vuide dal Parc naturâl des Dolomitis furlanis, Aldo Colonnello, fondadôr dal Circul culturâl Menocchio, e Franco Giordani, cjantautôr, o discuvierzarìn sedi i aspiets morfologjics e gjeologjics, sedi chei linguistics e musicâi di cheste zone dal Friûl.

 

Joibe ai 21 di Otubar dal 2021 des 5 daspò misdì aes 7 di sere

ALAGÂ
Paolo Paronuzzi, de Universitât dal Friûl, nus mene daûr des cuintis par mostrânus cemût che e je stade tirade sù la dighe e la dinamiche dal incident. Cun Antonio Cossutta o larìn invezit a cognossi lis propuestis didatichis dal Parc des Dolomitis furlanis. 

 

Joibe ai 28 di Otubar dal 2021 des 5 daspò misdì aes 7 di sere

JESSI
Jessi prime e jessi dopo: la dighe come cicatrîs te memorie. In gracie dal progjet “Ti rivedrò con gli occhi della memoria”, la associazion “Ecomuseo Vajont” nus puarte ae scuvierte dai borcs sdrumâts de violence de aghe. Italo Filippin e Renato Migotti, invezit, nus contin ce che al à significât il disastri pes comunitâts che a vivevin te val e cemût che la lôr vite e sedi cambiade par simpri. 

 

Joibe ai 4 di Novembar dal 2021 des 5 daspò misdì aes 7 di sere

ORLOI
Fulvio Comin, gjornalist e autôr di “Vajont: il giorno dopo”, al puarte indaûr lis speris dal timp intune croniche dai events di chê volte e de diaspore dai abitants di Nert. Cul fumetist Paolo Cossi o larìn a viodi cemût fermâ i moments su cjarte par podê contâju ai nestris fruts in gracie de tecniche dal fumet. 

 

Joibe ai 11 di Novembar dal 2021 des 5 daspò misdì aes 7 di sere

NEGLIGJENCE
No dome Vaiont: cuant che no si vûl imparâ la lezion. Cun Paolo Paronuzzi, de Universitât dal Friûl, o lin a scuvierzi altris disastris ambientâi causionâts dal om intal passât, in dì di vuê e, magari cussì no, ancje tal avignî. Carla Barnaba e Chiara Scaini, dal Centri di Ricercjis Sismologjichis dal Istitût Nazionâl di Oceanografie e di Gjeofisiche Sperimentâl di Triest, nus presentin il rûl de scuele e de ricercje inte moderazion dai risis, cu lis esperiencis pratichis in Friûl Vignesie Julie. 

 

Joibe ai 18 di Novembar dal 2021 des 5 daspò misdì aes 7 di sere

TESTEMONEANCE

La memorie tant che modon pal avignî. L’impegn dal museu “Longarone Vajont – Attimi di Storia” par tignî vîf il ricuart di ce che al è sucedût e passâ il testemoni aes gnovis gjenerazions. Cun di plui, e ven presentade une propueste di sperimentazion didatiche cun sîs unitâts didatichis pes classis III, IV e V de primarie, par cure di Linda Facini, Tamara Pozzebon e Anna Zossi, e dôs pe secondarie di I grât, par cure di Donatella Bello. 

 

 

Notis

 

I incuintris a son sore nuie e increditâts daûr des Liniis Vuide MIUR. Ae fin dal percors di formazion al vignarà dât fûr un atestât a seconde des oris fatis. Dut il percors si tignarà in linie su plateforme Zoom (i links di acès a vignaran mandâts vie mail a cui che si notarà). Si à di notâsi dentri di miercus ai 13 di Otubar sul nestri sît: www.scuelefurlane.it. Si à di jentrâ tal spazi dedicât al percors di formazion de pagjine principâl e lâ a compilâ la schede che si vierç fracant sul boton ISCRIVITI. Us rivarà subit une conferme de vuestre iscrizion, ma se no us rive scrivêt une mail a info@scuelefurlane.it o ben clamait il n. 0432-501598 int. 5.

Max100
Disp.29